tropy
Tropy su wobłuk na zemi, kotryž so namaka na woběmaj bokomaj ekwatora mjezy wobrotnikomaj słónca. Na kóždym dypku w tropach steji słónco dwójce w lěće w ceniće, tuž njejsu tam wulke přeměnjowanja temperatury abo dołhoty dnja, kaž je to zwonka tropow, na přikład w Europje. Tež počasy w našim zmysle njejsu, město toho maja tam dešćowy a suchi čas. Cyłolětna přerězna temperatura leži wokoło 25 °C.
W tropach su wšelakore wegetaciske pasma, kotrež su wotwisne wot mnóstwa a dołhoty spadkow:
- 12 do 9½ humidnych měsacow = tropiski dešćowy lěs
- 9½ do 7 h.m. = włóžna sawana
- 7 do 4½ h.m. = sucha sawana
- 4½ do 2 h.m. = ćernjojta sawana
- 2 do 0 h.m. = pusćina
W kónčinach blisko ekwatora so nimale cyłolětnje dešćuje, tuž namaka so předewšěm tam (na přikład w Amaconasowej nižinje abo w Kongowej žłobinje) dešćowy lěs.
