Sedema leşker şandin a Beşîkayê…

Enstîtuya Lêkolînên Rojhilata Navîn li Herêma Kurdistanê xebatên xwe didomîne. Merkeza wê li Hewlêrê ye. Serokê Enstîtuyê Dilaver Alaattin, îdîda kir ku “Bandora Tirkiyê li Îraqê her roj kêmtir dibe. Tirkiye ji vê rewşê aciz e û ji bo ku bandora xwe zêde bike leşker şandin Beşîkayê.”

Dilaver Alaattin di derheqê mijarên rojevê de mulaqetek da Ajansa Cîhanê ya Nûçeyan.

Îraq nikare bi serê xwe bersiva Tirkiyê bide
“Hêza Îraqê têrê nake ku bi tenê bertekekê nîşanî Tirkiyê bide. Diyar e ku Îran leşkerên Tirkiyê li Îraqê naxwaze. lê ji bo îro tenê bi devkî li dijî leşkerên Tirkiyê derdikeve. Heta ku Îraq piştevaniya Îran û Rusya nestîne newêre bi tenê li dijî Tirkiyê tiştekî bike. Niha Îran jî Rusya jî ji bo leşkerên Tirkiyê dengê xwe nakin lê gava rizgarkirina Musil hate rojevê dê çi bikin lazim e mirov li wê binêre.”

“Leşkerên Tirkiyê ji berê de li wir he ne û carcaran vê hêza xwe li dijî PKKê jî bi kar tîne. Di pêşerojê de îhtîmaleke bi vî rengî jî ne dûrî êqil e. Heke Tirkiyê leşkerên xwe li dijî PKKê bi kar bîne ne Herêma Kurdistanê ne jî Îraq dikare rê li ber Tirkiye bigre.  Heke Tirkiyê di vê mijarê de biryarê bide dê ne ji Kurdistanê ne jî ji Îraqê destûrê bixwaze. Gava tiştekî bi vî rengî çêbe zirara mezin Herêma kurdistanê û Îraq dê bibînin.”

Herdu aliyên pevçûnên li rojhilata Tirkiyê dê qezenc nekin

“Pevçûnên li rojhilata Tirkiyê kêrî kesî nayê. Destpêkirina pevçûnan pirsgirêka Kurdî zêdetir tevlîhev kir û çareseriya wê zehmettir kir. Ji bo çekberdanê divê ji nû ve zemîna dîyaloxeke dualî bê hazirkirin.”

“Ev şer û pevçûnên dawî kêrî kesî nayê. Herdu alî divê ji bo destpêkirina pêvajoyeke nû hewl bidin. Heke pevçûn bi vî rengî dewam bikin him ekonomiya Tirkiyê zirarê bibîne him jî hesta pêkvejiyanê dê zirarê bibîne. Paşê telafiya vê jî belkê ne mimkun be.”

Referandûm û îlankirina dewleteke serbixwe tiştên ji hev cuda ne

“Referandûma serxwebûnê û ragihandina dewleta Kurdî ne heman tişt in. Herdu ji hev cuda ne. Hemî partiyên siyasî yên li Kurdistanê piştevaniya referandûmê dikin lê ji bo çêkirina dema referandûmê di nava partiyan de helwesteke hevpar tine ye.”

“Dewleta Kurdî projeyek e û jê re demeke dirêj lazim e. Yanî ku referandûm bê kirin jî dibe ku ragihandina dewleta Kurdî bimîne demeke din. Herdu ji hev cuda ne. Ji bo ragihandina dewleteke Kurdî lazim e pêşengê Kurdan li ser hinek tiştan li hev bikin. Heke na, ragihandina dewletê ne tiştekî wisa rehet e. Ji yekhelwestiya partiyên Kurdî pê ve lazim e Îran û Bexda jî bê qanekirin. Aktorên mezin yên herêmê û cîhanê jî divê bêne qanekirin. Gerçî di vê mijarê de Hukimeta Kurdistanê gelekî pêşde çû. Êdî ji bo dewleteke Kurdî piştgiriyeke cihanî he ye.”

Dewleta Kurdî ya serbixwe ji dewsa Mêrsîn dibe ku Basrayê tercîh bike

Gava dewleteke Kurdî li ser van axan hate avakirin yek ji cîranê vê dewletê dê Îraq be. Heta niha, ku em çawa bi Îraqê re bi hev re jiyan em ê ji niha pê ve jî bi hev re bijîn. Loma têkiliyên bi Îran û Îraqê re qasî têkiliyên bi Tirkiyê re girîng in. Ji bo ku Kurdistan xwe bigihîne behrê ji dewsa Mêrsînê lazim e riya Tehran, Bexda û Şamê bi kar bîne.”

Ne yek, çar referandûm lazim in

“Gava tê gotin referandûm yekser mijara serxwebûnê tê hişê mirov. Lê ne wisa ye. Dibe ku Kerkuk, deverên bi îxtîlaf û Qanûna Bingehîn bi referandûmê safî bibin lê hê gelek meseleyên din jî hene. Hê pirsa referandûmê jî ne diyar e. Hê partiyên Kurdî ji bo naveroka referandûmê jî gotûbêj nekirine. Civîna partiyên Kurdî zehmet xuya nake lê heta niha jî nikarîn werin cem hev. Ji bo meşruiyeta referandûmê divê pêşî partiyên Kurdî li hev bikin.”