This Page is courtesy of Sanskrit Documents List.
Please send your corrections
jaya deva jagannātha jaya śaṅkara śāśvata | jaya sarvasurādhyakṣa jaya sarvasurārcita || 1|| jaya sarvaguṇātīta jaya sarvavaraprada | jaya nitya nirādhāra jaya viśvambharāvyaya || 2|| jaya viśvaikavandyeśa jaya nāgendrabhūṣaṇa | jaya gaurīpate śambho jaya candrārdhaśekhara || 3|| jaya koṭyarkasaṅkāśa jayānantaguṇāśraya | jaya bhadra virūpākṣa jayācintya nirañjana || 4|| jaya nātha kṛpāsindho jaya bhaktārtibhañjana | jaya dustarasaṁsārasāgarottāraṇa prabho || 5|| prasīda me mahādeva saṁsārārtasya khidyataḥ | sarvapāpakṣayaṁ kṛtvā rakṣa māṁ parameśvara || 6|| mahādāridryamagnasya mahāpāpahatasya ca | mahāśokaniviṣṭasya mahārogāturasya ca || 7|| ṛṇabhāraparītasya dahyamānasya karmabhiḥ | grahaiḥ prapīḍyamānasya prasīda mama śaṅkara || 8|| daridraḥ prārthayeddevaṁ pradoṣe girijāpatim | arthāḍhyo vā'tha rājā vā prārthayeddevamīśvaram || 9|| dīrghamāyuḥ sadārogyaṁ kośavṛddhirbalonnatiḥ | mamāstu nityamānandaḥ prasādāttava śaṅkara || 10|| śatravaḥ saṁkṣayaṁ yāntu prasīdantu mama prajāḥ | naśyantu dasyavo rāṣṭre janāḥ santu nirāpadaḥ || 11|| durbhikṣamarisantāpāḥ śamaṁ yāntu mahītale | sarvasasyasamṛddhiśca bhūyātsukhamayā diśaḥ || 12|| evamārādhayeddevaṁ pūjānte girijāpatim | brāhmaṇānbhojayet paścāddakṣiṇābhiśca pūjayet || 13|| sarvapāpakṣayakarī sarvaroganivāraṇī | śivapūjā mayā''khyātā sarvābhīṣṭaphalapradā || 14|| || iti pradoṣastotraṁ sampūrṇam ||
