asya śrī śivakavaca stotramahāmantrasya
ṛṣabhayogīśvara ṛṣiḥ |
anuṣṭup chandaḥ |
śrīsāmbasadāśivo devatā |
oṁ bījam |
namaḥ śaktiḥ |
śivāyeti kīlakam |
mama sāmbasadāśivaprītyarthe japeviniyogaḥ |
(karanyāsaḥ )
oṁ sadāśivāya aṁguṣṭhābhyāṁ namaḥ |
naṁ gaṁgādharāya tarjanībhyāṁ namaḥ |
maṁ mṛtyuñjayāya madhyamābhyāṁ namaḥ |
śiṁ śūlapāṇaye anāmikābhyāṁ namaḥ |
vāṁ pinākapāṇaye kaniṣṭhikābhyāṁ namaḥ |
yaṁ umāpataye karatalakarapṛṣṭhābhyāṁ namaḥ |
(hṛdayādi aṁganyāsaḥ )
oṁ sadāśivāya hṛdayāya namaḥ |
naṁ gaṁgādharāya śirasesvāhā |
maṁ mṛtyuñjayāya śikhāyaivaṣaṭ |
śiṁ śūlapāṇaye kavacāya huṁ |
vāṁ pinākapāṇaye netratrayāya vauṣaṭ |
yaṁ umāpataye astrāyaphaṭ |
bhūrbhuvassuvaromiti digbandhaḥ ||
(dhyānam )
vajradaṁśṭraṁ trinayanaṁ kālakaṇṭha mariṁdamam |
sahasrakaramatyugraṁ vande śaṁbhu mumāpatim ||
rudrākṣakaṅkaṇalasa tkaradaṇḍayugmaḥ
pālāntarālasitabhasmadhṛtatripuṇḍraḥ |
pañcākṣaraṁ paripaṭhan varamantrarājaṁ
dhyāyan sadā paśupatiṁ śaraṇaṁ vrajethāḥ ||
ataḥ paraṁ sarvapurāṇaguhyaṁ
niḥśeṣapāpaughaharaṁ pavitram |
jayapradaṁ sarvavipatpramocanaṁ
vakṣyāmi śaivam kavacaṁ hitāya te ||
(pañcapūjā )
laṁ pṛthivyātmane gandhaṁ samarpayāmi |
haṁ ākāśātmane puṣpaiḥ pūjayāmi |
yaṁ vāyvātmane dhūpamāghrāpayāmi |
raṁ agnyātmane dīpaṁdarśayāmi |
vaṁ amṛtātmane amṛtaṁ mahā naivedyam nivedayāmi |
saṁ sarvātmane sarvopacārapūjāṁ samarpayāmi ||
(mantraḥ )
ṛṣabha uvāca
namaskṛtya mahādevaṁ viśva vyāpina mīśvaram |
vakṣye śivamayam varma sarva rakṣākaraṁ nṛṇām ||
śucau deśe samāsīno yathāvatkalpitāsanaḥ |
jitendriyo jitaprāṇaścintayecchivamavyayam ||
hṛtpuṇḍarīkāntarasaṁniviṣṭaṁ
svatejasā vyāptanabho'vakāśam |
atīndriyaṁ sūkṣma manantamādyaṁ
dhyāyt parānandamayaṁ maheśam ||
dhyānāvadhūtākhilakarmabandha-
ściraṁ cidānanda nimagnacetāḥ |
ṣaḍakṣaranyāsa samāhitātmā
śaivena kuryātkavacena rakṣām ||
māṁ pātu devo'khiladevatātmā
saṁsārakūpe patitaṁ gabhīre |
tannāma divyaṁ paramantramūlaṁ
dhunotu me sarvamaghaṁ hṛdistham ||
sarvatra māṁ rakṣatu viśvamūrti-
rjyotirmayānandaghanaścidātmā |
aṇoraṇiyānuruśaktirekaḥ
sa īśvaraḥ pātu bhayādaśeṣāt ||
yo bhūsvarūpeṇa bibharti viśvaṁ
pāyātsa bhūmergiriśo'ṣtamūrtiḥ |
yo'pāṁ svarūpeṇa nṛṇāṁ karoti
saṁjīvanaṁ so'vatu māṁ jalebhyaḥ ||
kalpāvasāne bhuvanāni dagdhvā
sarvāṇi yo nṛtyati bhūrilīlaḥ |
sa kālarudro'vatu māṁ davāgneḥ
vātyādibhīte rakhilācca tāpāt ||
pradīptavidyutkanakāvabhāso
vidyāvarābhīti kuṭhārapāṇiḥ |
caturmukhastatpuruṣastrinetraḥ
prācyāṁ sthito rakṣatu māmajasram ||
kuṭhārakheṭāṅkuśa śūlaḍhakkā-
kapālapāśākṣa guṇāndadhānaḥ |
caturmukho nīlarucistrinetraḥ
pāyādaghoro diśi dakṣiṇasyām ||
kundenduśaṅkha sphaṭikāvabhāso
vedākṣamālā varadābhayāṅkaḥ |
tryakṣaścaturvaktra uruprabhāvaḥ
sadyo'dhijāto'vatu māṁ pratīcyām ||
varākṣamālābhaya ṭaṅkahastaḥ
saroja kiñjalka samānavarṇaḥ |
trilocanaścārucaturmukho māṁ
pāyādudīcyāṁ diśi vāmadevaḥ ||
vedābhayeṣṭāṅkuśa ṭaṅkapāśa-
kapālaḍhakkākṣaraśūlapāṇiḥ |
sitadyutiḥ pañcamukho'vatānmāṁ
īśāna ūrdhvaṁ paramaprakāśaḥ ||
mūrdhānamavyā nmama candramauliḥ
phālaṁ mamāvyādatha phālanetraḥ |
netre mamāvyā dbhaganetrahārī
nāsāṁ sadā rakṣati viśvanāthaḥ ||
pāyāchrutī me śrutigītakīrtiḥ
kapolamavyā tsatataṁ kapālī |
vaktraṁ sadā rakṣatu pañcavaktro
jihvāṁ sadā rakṣatu vedajihvaḥ ||
kaṇṭhaṁ girīśo'vatu nīlakaṇṭhaḥ
pāṇidvayaṁ pātu pinākapāṇiḥ |
dormūlamavyānmama dharmabāhuḥ
vakṣaḥ sthalaṁ dakṣamakhāntako'vyāt ||
mamodaraṁ pātu girīndradhanvā
madhyaṁ mamāvyā nmadanāntakārī |
herambatāto mama pātu nābhiṁ
pāyātkaṭiṁ dhūrjaṭirīśvaro me ||
ūrudvayaṁ pātu kuberamitro
jānudvayaṁ me jagadīśvaro'vyāt |
jaṅghāyugaṁ puṅgavaketuravyāt
pādau mamāvyā tsuravandyapādaḥ ||
maheśvaraḥ pātu dinādiyāme
māṁ madhyayāme'vatu vāmadevaḥ |
trilocanaḥ pātu tṛtīyayāme
vṛṣadhvajaḥ pātu dināntyayāme ||
pāyānniśādau śaśiśekharo māṁ
gaṅgādharo rakṣatu māṁ niśīthe |
gaurīpatiḥ pātu niśāvasāne
mṛtyuṁjayo rakṣatu sarvakālam ||
antaḥsthitaṁ rakṣatu śaṁkaro māṁ
sthāṇuḥ sadā pātu bahiḥsthitaṁ mām |
tadantare pātu patiḥ paśūnāṁ
sadāśivo rakṣatu māṁ samantāt ||
tiṣṭhantamavyād bhuvanaikanāthaḥ
pāyādvrajantaṁ pramathādhināthaḥ |
vedāntavedyo'vatu māṁ niṣaṇṇaṁ
māmavyayḥ pātu śivaḥ śayānam ||
mārgeṣu māṁ rakṣatu nīlakaṇṭhaḥ
śailādidurgeṣu puratrayāriḥ |
araṇyavāsādi mahāpravāse
pāyānmṛgavyādha udāraśaktiḥ ||
kalpāntakālograpaṭuprakopa-
sphuṭāṭṭahāsoccalitāṇḍakośaḥ |
ghorārisenārṇava durnivāra-
mahābhayā drakṣatu vīrabhadraḥ ||
pattyaśvamātaṅgarathāvarūthinī-
sahasralakṣāyuta koṭibhīṣaṇam |
akśauhiṇīnāṁ śatamātatāyināṁ
chindyānmṛḍo ghorakuṭhāra dhārayā ||
nihantu dasyūnpralayānalārciḥ
jvalattriśūlaṁ tripurāntakasya |
śārdūlasiṁharkṣavṛkādihiṁsrān
saṁtrāsaya tvīśadhanuḥ pinākaḥ ||
duḥ svapna duḥ śakuna durgati daurmanasya-
durbhikṣa durvyasana duḥ saha duryaśāṁsi |
utpātatāpaviṣabhītimasadgrahārtiṁ
vyādhīṁśca nāśayatu me jagatāmadhīśaḥ ||
oṁ namo bhagavate sadāśivāya sakalatatvātmakāya sarvamantrasvarūpāya
sarvayantrādhiṣṭhitāya sarvatantrasvarūpāya sarvatatvavidūrāya
brahmarudrāvatāriṇe nīlakaṇṭhāya pārvatīmanoharapriyāya
somasūryāgnilocanāya bhasmoddūlita vigrahāya mahāmaṇi mukuṭadhāraṇāya
māṇikyabhūṣaṇāya sṛśṭisthiti pralayakālaraudrāvatārāya
dakṣādhvaradhvaṁsakāya mahākāla bhedanāya mūladhāraikanilayāya
tatvātītāya gaṁgādharāya sarvadevādidevāya ḍāśrayāya vedāntasārāya
trivargasādhanāya anantakoṭi brahmāṇḍanāyakāya ananta vāsuki
takṣaka kārkoṭaka śaṅkha kulika padma mahāpadmeti aṣṭamahānāga
kulabhūṣaṇāya praṇavasvarūpāya cidākāśāya ākāśa dik svarūpāya
grahanakṣatramāline sakalāya kalaṅkarahitāya sakalalokaikakartre
sakalalokaikabhartre sakalalokaikasaṁhartre sakalalokaikagurave
sakalalokaikasākṣiṇe sakalanigamaguhyāya sakala vedānta pāragāya
sakalalokaikavarapradāya sakalalokaikaśaṁkarāya
sakaladuritārtibhañjanāya sakalajagadabhayaṁkarāya śaśāṅkaśekharāya
śāśvatanijāvāsāya nirākārāya nirābhāsāya nirāmayāya nirmalāya
nirmadāya niścintāya nirahaṁkārāya niraṁkuśāya niṣkalaṅkāya
nirguṇāya niṣkāmāya nirūpaplavāya niravadyāya nirantarāya
niṣkāraṇāya nirātaṁkāya niṣprapañcāya nissaṅgāya nirdvandvāya
nirādhārāya nīrāgāya niṣkrodhāya nirlopāya niṣpāpāya
nirbhayāya nirvikalpāya nirbhedāya niṣkriyāya nistulāya
nissaṁśayāya niraṁjanāya nirupamavibhavāya
nityaśuddabuddamuktaparipūrṇasaccidānandādvayāya paramśānatasvarūpāya
paramaśāntaprakāśāya tejorūpāya tejomayāya tejo'dhipataye jaya
jaya rudra mahārudra mahāraudra bhadrāvatāra mahābhairava
kālabhairava kalpāntabhairava kapālamālādhara khaṭvāṅga
carmakhaḍgadhara pāśāṅkuśa ḍamaru triśūla cāpa bāṇa gadā śakti
bhiṇḍi vāla tomara musala bhuśuṇṭhi mudgara pāśa parighaśataghnī
cakrādyāyudhabhīṣaṇākāra sahasramukha daṁṣṭrākarālavadana
vikaṭāṭṭahāsa visphāritabrahmāṇḍamaṇḍala nāgendrakuṇḍala nāgendrahāra
nāgendravalaya nāgendracarmadhara nāgendraniketana mṛtyuñjaya
tryambaka tripurāntaka viśvarūpa virūpākṣa viśveśvara
vṛṣabhavāhana viṣabhūṣaṇa viśvatomukha sarvatomukha māṁ
rakṣarakṣa jvala jvala prajvala prajvala mahāmṛtyubhayaṁ
śamaya śamaya apamṛtyubhayaṁ nāśaya nāśaya rogabhayaṁ
utsādayotsādaya viṣasarpabhayaṁ śamaya śamaya corān māraya māraya
mama śatrūn uccāṭayoccāṭaya triśūlene vidāraya vidāraya
kuṭhārene bhindhi bhindhi khaḍgena chinddi chinddi khaṭvāṅgena
vipodhaya vipodhaya mama pāpaṁ śodhaya śodhaya musalena niṣpeṣaya
niṣpeṣaya bāṇaiḥ saṁtāḍaya saṁtāḍaya yakṣa rakṣāṁsi bhīṣaya
bhīṣaya aśeṣa bhūtān vidrāvaya vidrāvaya
kūṣmāṇḍabhūtavetālamārīgaṇabrahmarākṣasagaṇān saṁtrāsaya saṁtrāsaya
mama abhayaṁ kuru kuru narakbhayānmāṁ uddara uddara vitrastaṁ māṁ
āśvāsaya āśvāsaya amṛtakaṭākṣavīkṣaṇena māṁ ālokaya ālokaya
saṁjīvaya saṁjīvaya kṣuttṛṣṇārtaṁ māṁ āpyāyaya āpyāyaya
duḥkhāturaṁ māṁ ānandaya ānandaya śivakavacena māṁ ācchādaya
ācchādaya hara hara mṛtyuṁjaya tryambaka sadāśiva paramaśiva
namaste namaste namaḥ ||
pūrvavat - hṛdayādi nyāsaḥ | pañcapūjā ||
bhūrbhuvassuvaromiti digvimokaḥ ||
(phala śrutiḥ )
ṛṣabha uvāca -
ityetatparamaṁ śaivaṁ kavacaṁ vyāhṛtaṁ mayā |
sarva bādhā praśamanaṁ rahasyaṁ sarva dehinām ||
yaḥ sadā dhārayenmartyaḥ śaivaṁ kavacamuttamam |
na tasya jāyate kvāpi bhayaṁ śaṁbhoranugrahāt ||
kṣīṇāyuḥ prāptamṛtyurvā mahārogahato'pi vā |
sadyaḥ sukhamavāpnoti dīrghamāyuśca vindati ||
sarvadāridrayaśamanaṁ saumāṅgalyavivardhanam |
yo dhatte kavacaṁ śaivaṁ sa devairapi pūjyate ||
mahāpātakasaṅghanātairmucyate copapātakaiḥ |
dehānte muktimāpnoti śivavarmānubhāvataḥ ||
tvamapi śraddayā vatsa śaivaṁ kavacamuttamam |
dhārayasva mayā dattaṁ sadyaḥ śreyo hyavāpsyasi ||
śrīsūta uvāca -
ityuktvā ṛṣabho yogī tasmai pārthiva sūnave |
dadau śaṅkhaṁ mahārāvaṁ khaḍgaṁ ca ariniṣūdanam ||
punaśca bhasma saṁmantrya tadaṅgaṁ parito'spṛśat |
gajānāṁ ṣaṭsahasrasya dviguṇasya balaṁ dadau ||
bhasmaprabhāvāt saṁprāptabalaiśvarya dhṛti smṛtiḥ |
sa rājaputraḥ śuśubhe śaradarka iva śriyā ||
tamāha prāñjaliṁ bhūyaḥ sa yogī nṛpanandanam |
eṣa khaḍgo mayā dattastapomantrānubhāvataḥ ||
śitadhāramimaṁ khaḍgaṁ yasmai darśayasi sphuṭam |
sa sadyo mriyate śatruḥ sākṣānmṛtyurapi svayam ||
asya śaṅkhasya nirhrādaṁ ye śṛṇvanti tavāhitāḥ |
te mūrcchitāḥ patiṣyanti nyastaśastrā vicetanāḥ ||
khaḍgaśaṅkhāvimau divyau parasainyavināśakau |
ātmasainyasvapakṣāṇāṁ śauryatejovivardhanau ||
etayośca prabhāvena śaivena kavacena ca |
dviṣaṭsahasra nāgānāṁ balena mahatāpi ca ||
bhasmadhāraṇa sāmarthyācchatrusainyaṁ vijeṣyase |
prāpya siṁhāsanaṁ pitryaṁ goptāsi pṛthivīmimām ||
iti bhadrāyuṣaṁ samyaganuśāsya samātṛkam |
tābhyāṁ saṁpūjitaḥ so'tha yogī svairagatiryayau ||
(iti śrīskānde mahāpurāṇe brahmottarakhaṇḍe śivakavaca prabhāva
varṇanaṁ nāma dvādaśo'dhyāyaḥ saṁpūrṇaḥ || )
