śivatāṇḍava stotram

jaṭāṭavīgalajjalapravāhapāvitasthale
          gale'valambya lambitāṁ bhujaṅgatuṅgamālikām |
ḍamaḍḍamaḍḍamaḍḍamanninādavaḍḍamarvayaṁ
          cakāra caṇḍtāṇḍavaṁ tanotu naḥ śivaḥ śivam || 1||

jaṭākaṭāhasaṁbhramabhramannilimpanirjharī-
     -vilolavīcivallarīvirājamānamūrdhani |
dhagaddhagaddhagajjvalallalāṭapaṭṭapāvake
      kiśoracandraśekhare ratiḥ pratikśaṇaṁ mama || 2||

dharādharendranaṁdinīvilāsabandhubandhura
      sphuraddigantasantatipramodamānamānase |
kṛpākaṭākśadhoraṇīniruddhadurdharāpadi
      kvaciddigambare(kvaciccidaṁbare) mano vinodametu vastuni || 3||

jaṭābhujaṅgapiṅgalasphuratphaṇāmaṇiprabhā
      kadambakuṅkumadravapraliptadigvadhūmukhe |
madāndhasindhurasphurattvaguttarīyamedure
     mano vinodamadbhutaṁ bibhartu bhūtabhartari || 4||

sahasralocanaprabhṛtyaśeṣalekhaśekhara
     prasūnadhūlidhoraṇī vidhūsarāṅghripīṭhabhūḥ |
bhujaṅgarājamālayā nibaddhajāṭajūṭaka
     śriyai cirāya jāyatāṁ cakorabandhuśekharaḥ || 5||

lalāṭacatvarajvaladdhanañjayasphuliṅgabhā-
    -nipītapañcasāyakaṁ namannilimpanāyakam |
sudhāmayūkhalekhayā virājamānaśekharaṁ
     mahākapālisampadeśirojaṭālamastu naḥ  || 6||

karālabhālapaṭṭikādhagaddhagaddhagajjvala-
     ddhanañjayāhutīkṛtapracaṇḍapañcasāyake |
dharādharendranandinīkucāgracitrapatraka-
    -prakalpanaikaśilpini trilocane ratirmama ||| 7||

navīnameghamaṇḍalī niruddhadurdharasphurat-
     kuhūniśīthinītamaḥ prabandhabaddhakandharaḥ |
nilimpanirjharīdharastanotu kṛttisindhuraḥ
     kalānidhānabandhuraḥ śriyaṁ jagaddhuraṁdharaḥ || 8||

praphullanīlapaṅkajaprapañcakālimaprabhā-
    -valambikaṇṭhakandalīruciprabaddhakandharam |
smaracchidaṁ puracchidaṁ bhavacchidaṁ makhacchidaṁ
     gajacchidāṁdhakachidaṁ tamaṁtakacchidaṁ bhaje || 9||

akharva(agarva)sarvamaṅgalākalākadaṁbamañjarī
     rasapravāhamādhurī vijṛṁbhaṇāmadhuvratam |
smarāntakaṁ purāntakaṁ bhavāntakaṁ makhāntakaṁ
     gajāntakāndhakāntakaṁ tamantakāntakaṁ bhaje || 10||

jayatvadabhravibhramabhramadbhujaṅgamaśvasa-
    -dvinirgamatkramasphuratkarālabhālahavyavāṭ |
dhimiddhimiddhimidhvananmṛdaṅgatuṅgamaṅgala
     dhvanikramapravartita pracaṇḍatāṇḍavaḥ śivaḥ || 11||

dṛṣadvicitratalpayorbhujaṅgamauktikasrajor-
    -gariṣṭharatnaloṣṭhayoḥ suhṛdvipakśapakśayoḥ |
tṛṣṇāravindacakśuṣoḥ prajāmahīmahendrayoḥ
     samapravṛtikaḥ (samaṁ pravartayanmanaḥ) kadā sadāśivaṁ bhaje || 12||

kadā nilimpanirjharīnikuñjakoṭare vasan
     vimuktadurmatiḥ sadā śiraḥ sthamañjaliṁ vahan |
vimuktalolalocano lalāmabhālalagnakaḥ
     śiveti maṁtramuccaran kadā sukhī bhavāmyaham || 13||

idam hi nityamevamuktamuttamottamaṁ stavaṁ
     paṭhansmaranbruvannaro viśuddhimetisaṁtatam |
hare gurau subhaktimāśu yāti nānyathā gatiṁ
     vimohanaṁ hi dehināṁ suśaṅkarasya ciṁtanam || 14||

pūjāvasānasamaye daśavaktragītaṁ yaḥ
     śaṁbhupūjanaparaṁ paṭhati pradoṣe |
tasya sthirāṁ rathagajendraturaṅgayuktāṁ
     lakśmīṁ sadaiva  sumukhiṁ pradadāti śaṁbhuḥ || 15||

   || iti śrīrāvaṇaviracitaṁ śivatāṇḍavastotraṁ saṁpūrṇam||