阿爾巴尼亞

  提示：呢篇文講嘅唔係阿爾及利亞。

阿爾巴尼亞共和國 Republika e Shqiperise  （阿爾巴尼亞文）
旗 國徽
格言： 「Ti, Shqipëri, më jep nder, më jep emrin Shqiptar」 （阿爾巴尼亞文） 「係你，阿爾巴尼亞，畀我榮耀，畀我阿爾巴尼亞人呢個名」
國歌：Himni i Flamurit（阿爾巴尼亞文）   《旗之讚歌》
阿爾巴尼亞嘅位置（green） 歐洲（深灰）  —  [圖例放大]
首都	地拉那 41°19′N 19°49′E
最大城市	首都
官方語言	阿爾巴尼亞文1
族裔	98.2% 阿爾巴尼亞人 1.8% 其他
宗教 （2023年）	50.67% 伊斯蘭教 16.02% 基督宗教 13.83% 無宗派 3.55% 無神論 0.15% 其他 15.77% 未申報
政府	議會共和國
• 總統	巴伊拉姆·貝加伊
• 總理	埃迪·拉馬
• 國會議長	格拉莫茲·魯奇
國史
• 伊利里亞	公元前2000年
• 科馬尼－克魯亞文化	約700年
• 阿爾貝爾公國	1190年
• 萊什同盟	1444年3月2日
• 脫離鄂圖曼帝國獨立	1912年11月28日
• 列強承認	1912年12月2日
• 現行憲法	1998年11月28日
面積
• 總計	28,748 km2（11,100 sq mi）（第143位）
• 水域（%）	4.7
人口
• 2022年估計	2,793,592（第139位）
• 密度	97.0/km2（251.2/sq mi）
GDP（PPP）	2023年年估算
• 總計	559.28億美元
• 人均	19,566美元（第118位）
GDP（國際匯率）	2023年年估算
• 總計	230.32億美元（第121位）
• 人均	8,057美元
堅尼系數（%，2023年）	30.2 中
HDI（2025年）	0.810 極高 · 第70位
貨幣	列克（ALL）
時區	UTC+1 （中歐時間）
• 夏令時（DST）	UTC+2 （中歐夏令時間）
行車方向	右邊
電話區號	355
互聯網頂級域	.al
希臘文、馬其頓文同其他地區語言，屬於政府承認嘅少數族群語言。
∗由於唔同嘅排名表計法未必一樣，上面嘅排名（第幾名/位）同個一覽表入面個排名未必一樣。 ∗IMF網站嘅人均GDP數字，同用GDP除以上面人口數得出嚟嘅數有可能唔一樣。

阿爾巴尼亞，正式國名叫阿爾巴尼亞共和國（阿爾巴尼亞文：Republika e Shqipërisë），係一個坐落喺東南歐巴爾幹半島嘅國家，首都兼最大城市係地拉那。阿爾巴尼亞西臨亞德里亞海同愛奧尼亞海，兩者同屬地中海水域；陸上邊界方面，西北同黑山接壤，東北黐住科索沃，東面接北馬其頓，南面則同希臘為界。全國面積約28,748 平方公里，氣候、地質、水文同地貌條件多樣。國土景觀極其壯麗，既有長年積雪、崎嶇不平嘅山脈——好似阿爾巴尼亞阿爾卑斯山同科拉布山——亦有沿住兩大海域伸展、土質肥沃嘅低地平原。

阿爾巴尼亞古時由多個伊利里亞部族居住，包括阿爾迪埃伊人同陶蘭提亞人等等，而西南一帶則有喬奧尼斯人聚居。古希臘人亦曾喺沿岸興建殖民城邦，當中以阿波羅尼亞最享負盛名。喺馬其頓王國興起之前，伊利里亞人一直係當地嘅主導勢力。 經過伊利里亞戰爭之後，阿爾巴尼亞被納入羅馬帝國版圖，並喺帝國分裂後繼續屬於拜占庭帝國。中世紀期間，多個公國先後湧現。15世紀，阿爾巴尼亞喺民族英雄斯坎德培嘅帶領下，成為抵抗鄂圖曼擴張嘅重心，成功阻擋敵軍進犯超過二十載。雖然最終不敵，淪為鄂圖曼帝國藩屬成四百年咁耐，但阿爾巴尼亞人依然守住咗獨特嘅文化認同，並喺 19 世紀掀起咗場阿爾巴尼亞文藝復興運動。1912年，阿爾巴尼亞宣佈獨立；其後嘅20世紀動盪不斷，先後經歷君主制、兩戰期間嘅外國佔領，以至恩維爾·霍查治下嘅共產政權。1997年，阿爾巴尼亞發生阿爾巴尼亞社會黨同阿爾巴尼亞民主黨人之間嘅內戰，最終被聯合國維持和平部隊所平息。

自獨立以嚟，阿爾巴尼亞歷經多次政治轉變，由君主制轉入共產主義體制，最終成為一個主權、議會制嘅立憲共和國。國家以憲法為尊，強調權力分立，政治架構包括議會、象徵性嘅總統、具實權嘅總理，以及分層嘅司法體系。阿爾巴尼亞屬於發展中國家，其中高收入經濟體系以服務業為主，製造業同旅遊業亦佔重要地位；單喺2024年，到訪遊客已突破一千一百萬人次。 自共產制度瓦解，國家由計劃經濟轉向市場經濟。國民亦享有全民醫療保障同免費基礎教育。現時，該國已成為歐盟正式候選國，並自2022年起展開入盟談判。

名源

「阿爾巴尼亞」呢個名起源於中世紀拉丁文，根源可以追溯到古代伊利里亞（Illyrian）嘅阿爾巴尼部落。呢種歷史聯繫喺公元2世紀古希臘地理學家托勒密嘅著作入面得到支持，佢提到喺都拉斯（Durrës）東北面有一個叫「阿爾巴諾波利斯」（Albanopolis）嘅定居點。除此之外，中世紀文獻亦都記載過一個叫「阿爾巴諾」（Albano）或者「阿爾巴農」（Albanon）嘅聚落，反映出呢個地名喺歷史上好大機會係一直流傳落嚟嘅。不過，到底阿爾巴諾波利斯同阿爾巴諾係唔係同一個地方，同埋呢啲歷史記載之間嘅確切關係係點，到今日仲係學者爭論嘅焦點。

「阿爾巴尼亞人」最早而又無爭議嘅歷史記載，可以喺11世紀拜占庭歷史學家米海爾·阿塔雷亞迪斯（Michael Attaleiates）嘅著作睇到。書入面提到，佢哋喺1079年曾經參與過一場反抗君士坦丁堡嘅起義。 除咗咁，佢亦都將「阿爾巴尼塔人」（Albanoitai）視為杜拉佐公爵（Duke of Dyrrhachium）旗下嘅臣民。喺中世紀嗰陣，阿爾巴尼亞人叫自己個地方做 Arbëri 或者 Arbëni，而佢哋自稱就係 Arbëreshë 或者 Arbëneshë。

至於現時阿爾巴尼亞人叫自己國家做嘅「Shqipëri」（或者 Shqipëria），歷史起源可以追溯到 14 世紀。 不過，呢套稱呼要等到 17 世紀末至 18 世紀初，先至逐漸取代原本嘅 Arbëria 同 Arbëreshë，變成族群內部通用嘅名。呢兩個詞語喺民間被廣泛解讀為「鷹之地」同埋「鷹之子」嘅象徵。

出面網頁

• 阿爾巴尼亞嘅官方網站
• Qeveria Shqiptare Keshilli i Ministrave
• National Tourism Organization, Albania's official website for travel & tourism information
• 〈国家概况 — 中华人民共和国外交部〉 (簡體中文)。中華人民共和國外交部。
• 〈阿爾巴尼亞共和國 Republic of Albania - 歐洲地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "Albania - United States Department of State" (英文). 美國國務院.
• 阿爾巴尼亞喺中央情報局《世界概況》嘅資料 （英文）
• 〈アルバニア共和国 ｜ 外務省〉 (日文)。日本外務省。
• "Albania - Department of Foreign Affairs and Trade" (英文). 澳洲外交貿易部.